O novo sistema de recollida de lixo orgánico comezará a funcionar en novembro

A iniciativa, que busca separar os residuos orgánicos do resto do lixo, está xa en marcha coa instalación dos colectores marróns nos cascos urbanos de Redondela e Chapela. A veciñanza que se sume a esta recollida contará cunha chave para abrir este quinto colector e depositar neles os restos que se trasladarán a planta de Sogama para a súa transformación en compost. Dentro da campaña continúa tamén o reparto de composteiros nas zonas rurais. As persoas interesadas poden solicitalo no teléfono 986 400 300 ou a través da solicitude online que se atopa na páxina web do concello.

Case a metade do lixo que producimos nas nosas casas é materia orgánica. Para garantir un bo tratamento e conversión deste lixo en compost estase a implantar nos Concellos o colector marrón que ten como uso exclusivo a recollida de bio-residuos e que supón ademias cumprir coa lexislación vixente. Este depósito ten a particularidade de estar pechado, coa finalidade de concienciar á veciñanza da separación de residuos orgánicos.

Os novos colectores instalaranse nos cascos urbanos de Redondela e Chapela e no seu interior a veciñanza que se adhira o programa deberá depositar residuos como restos de froita, verdura, carne e peixe, cunchas de mariscos ou froitos secos, restos de pan, café, infusión, papel de cociña, restos de plantas, cortizas… En definitiva, calquera resto orgánico.

Unha iniciativa que explica o edil de sostibilidade Roberto Villar, precisa da involucración da veciñanza. O concelleiro adianta que ademais dos beneficios medioambientais que conleva suporá, de cara ao futuro, compensacións económicas, é dicir, que aquelas persoas que reciclen e separen axeitadamente os seus rexiduos verán reducido o seu recibo.

Durante as vindeiras semanas van realizarse accións informativas a pé de rúa para dar a coñecer o funcionamento desta nova práctica de reciclaxe e para que a veciñanza poida darse de alta na campaña e recoller a súa chave e kit de benvida.

O obxectivo é superar o 30% da poboación que adoita sumarse a estas inicaitivas polo que se anima a veciños e grandes produtores como poida ser a hostalarías, froitarías e outros negocios que se adhiran a esta campaña. Anima a poboación a modificar as súas costumes e ir a prácticas maís solidarias con medio ambiente.

Dentro da campaña continúa tamén o reparto de composteiros nas zonas rurais. Así, as persoas que residan nunha vivenda illada e que conten cunha parcela ou horta, dun mínimo de 25m2, pode solicitar un composteiro individual ben chamando ao teléfono do Concello 986 400 300 ou a través da solicitude online que se atopa na páxina web do concello.