Foto de arquivo
As Bibliotecas Municipais de Redondela poñen en marcha unha nova edición dos seus clubs de lectura, unha iniciativa que busca fomentar o hábito lector e crear un espazo de encontro e intercambio de opinións arredor da literatura. As persoas interesadas en participar xa poden formalizar a súa inscrición. As xuntanzas, de carácter mensual e gratuítas, comezarán no mes de outubro.
A proposta conta con dous clubs de lectura, un na Biblioteca P. M. Valle-Inclán de Redondela e outro na Biblioteca P. M. Xela Arias de Chapela. En ambos os casos, as reunións terán carácter mensual e en cada sesión abordarase a lectura dun libro diferente, procurando ofrecer propostas variadas e diversas que se adapten aos distintos gustos e estilos das persoas participantes.
As sesións están concibidas como un espazo aberto ao diálogo e á reflexión. Así, as conversas poden xirar arredor de aspectos como o estilo literario, a temática da obra, o pensamento do autor ou autora ou as impresións e emocións que a lectura provoca en cada participante. Deste xeito, cada encontro ofrece a oportunidade de compartir diferentes perspectivas sobre unha mesma obra.
Para participar é necesario ter 18 anos ou máis, dispoñer do carné de socia/o da Rede de Bibliotecas Públicas de Galicia e realizar previamente a inscrición nun dos clubs. As persoas que aínda non dispoñan do carné poderán tramitalo no mesmo momento da inscrición.
A participación é de balde e as propias bibliotecas facilitarán os exemplares dos libros seleccionados para cada sesión. O número de prazas é limitado.
Na Biblioteca P. M. Valle-Inclán de Redondela, as reunións celebraranse un venres ao mes, ás 20:00 horas, no Paseo da Xunqueira, s/n, Edificio Multiúsos, 1º andar. Para máis información, as persoas interesadas poden contactar no teléfono 986 401 561 ou no correo electrónico bibliotecaredondela@redondela.gal.
Pola súa banda, na Biblioteca P. M. Xela Arias de Chapela, as sesións terán lugar un luns ao mes, ás 20:00 horas, na rúa Piñeiral, nº 22, Edificio Multiúsos, 1º andar. A información e inscrición poden solicitarse no teléfono 986 454 226 ou no enderezo bibliotecachapela@redondela.gal.
As primeiras xuntanzas desta nova edición dos clubs de lectura terán lugar no mes de outubro.
