A campaña de normalización lingüística proposta polo concello achega monólogos, teatro e espectáculos familiares no Multiúsos de Arcade a partir deste 27 de febreiro. A programación arrancará co monólogo “Orille” de Pepo Suevos este venres ás 20:30 horas. Todos as actividades enmarcadas dentro do ciclo “Goza do teu punto G son de balde.
O alcalde de Soutomaior, Manu Lourenzo, e a técnica de Cultura do Concello, Sonia Pintos, presentaron unha programación que busca animar a toda a veciñanza a gozar das principais referencias artísticas do país cunha axenda municipal que inclúe espectáculos teatrais dirixidos ao público adulto, á mocidade e ao infantil familiar.
Unhas propostas que chegarán da man de grandes compañías como Ibuprofeno Teatro, Excéntricas, Gallaecia Eventos, A Covas da Letras, Galitoon. Tamén aterrarán en Soutomaior monologuistas da talla de Pepo Suevos, Oswaldo Digón, Aratxa Treus e Jazmín Abuín, Quico Cadaval, Evaristo Calvo ou Leti da Taberna ou narradoras orais como Vero Rilo.
Todos estes espectáculos serán de balde ata completar o aforo, o espazo onde se celebrarán estas citas coas artes escénicas será o Multiúsos de Arcade.
Un calendario de actuacións que comezará xa este venres 27 de febreiro co monólogo ORILLE de Pepo Suevos. Unha cita que dará comezo ás 20:30h., apertura de portas ás 20:00h.
