A asociación denuncia a falta de planificación e estabilidade nas infraestruturas culturais do municipio e reclama medidas urxentes para garantir a apertura continuada dos museos locais como o Meirande ou a mostra de Sargadelos na Casa da Torre. Temen que o futuro museo municipal que albergará a obra de Ángel Barros siga a mesma sorte.
A Asociación Cultural Alén Nós amosa a súa preocupación pola situación museística que atravesa Redondela, que cualifica de “grave e estrutural”. A entidade considera que o peche do Museo Meirande non pode interpretarse como un simple trámite administrativo vinculado á finalización de contratos, senón como a consecuencia da ausencia dunha política cultural sólida e planificada. Lembran que Meirande debería ser unha infraestrutura estratéxica para o municipio, un espazo de referencia para a interpretación do patrimonio industrial, a Batalla de Rande e a historia marítima local, pero funciona sen persoal municipal fixo adscrito e sen unha estrutura consolidada que garanta o seu funcionamento regular.
A situación, engaden, vese agravada polo peche prolongado da exposición de Sargadelos na Casa dá Torre. Trátase dunha colección de alto valor artístico e patrimonial doada ao Concello que permanece sen exhibición estable desde hai anos. Para a asociación, o problema non radica na falta de contido ou de recursos materiais, senón na ausencia dunha decisión firme por parte das institucións responsables para garantir a súa apertura regular.
Así mesmo, lembran que o proxecto do museo da historia e da etnografía de Redondela (MUDHAR), anunciado no seu momento, non experimentou avances coñecidos. Mentres tanto, materiais, documentos e memoria oral continúan sen un espazo propio onde ser conservados e divulgados con rigor.
Por outra banda, celebran o anunciou da creación dun museo municipal para albergar a obra do pintor redondelán Angel Barros, aínda que insisten en que debe planificarse con estabilidade e recursos propios para evitar reproducir os problemas que afectan actualmente a Meirande.
A asociación conclúe que Redondela conta con patrimonio arqueolóxico, histórico, industrial e etnográfico suficiente para soster unha rede museística estable e ambiciosa polo que fan un chamamento ás institucións para que adopten medidas concretas que garantan a apertura dos museos durante todo o ano, con planificación a longo prazo e financiamento propio.
