A Mesa de Saúde contempla diferentes accións para a mellora dos hábitos de vida da veciñanza de Redondela. A primeira dará comezo no vindeiro mes de abril e estará encamiñada á diminución do sedentarismo en persoas adultas así como á mellora da socialización e das relacións sociais.
A Mesa de Saúde de Redondela, na que participan o Concello, Centro de Saúde, Rede Galega de Promoción da Saúde (Regaps) e colectivos e asociacións redondeláns, acordou na súa última reunión diferentes iniciativas encamiñadas a mellorar a saúde da poboación de todas as idades.
Así, ademais de intervir en situacións de soidade non desexada, traballarase tamén noutros aspectos detectados no diagnóstico comunitario, como o sedentarismo e a alimentación. A primeira acción, que comezará en abril, estará orientada a reducir o sedentarismo en persoas adultas e a fomentar a socialización e as relacións sociais, e estará dirixida por profesionais da REGAPS e do Centro de Saúde.
Outro dos acordos adoptados foi a elaboración dunha recompilación de todos os recursos de saúde existentes no municipio. Para iso habilitouse un formulario web que permitirá recoller información de todas as entidades que desenvolvan actividades relacionadas coa saúde. Estes datos pasarán a formar parte do Mapeo de Activos en Saúde “Atopa Saúde”.
A próxima reunión, prevista para mediados de marzo, centrarase en desenvolver unha proposta xurdida no grupo de Saúde Infanto-Xuvenil: a organización dunha Semana sen Fume aberta a toda a poboación. Cada entidade participante achegará as súas ideas para acordar e concretar a programación desta iniciativa.
Desde a Mesa de Saúde animan a asociacións, entidades e centros do municipio a sumarse a este traballo colaborativo co obxectivo de mellorar o benestar da poboación, especialmente da infancia, a adolescencia e as persoas adultas.
Para ampliar máis información sobre estes grupos de traballo e sobre a Mesa de Saúde de Redondela pódese contactar coa equipa da REGAPS na área sanitaria de Vigo, a través do correo: regaps.vigo@sergas.es, ou tlf./WhatsApp: 648 116 564.
