Os Cantos de Reis de Soutoxuste volven encher de alegría as rúas nestas datas tan especiais. Este ano, a agrupación da parroquia saíu a cantar o 4 de xaneiro polos camiños do barrio, anticipándose un día debido ás previsións meteorolóxicas. Formada por nenos, nenas e adultos veciños da zona, o grupo leva ensaiando desde decembro para recuperar e manter viva esta tradición galega tan arraigada.
As voces dos participantes van acompañadas dunha instrumentación sinxela e festiva: cunchas, pandeiretas, tambor e gaita, que dan un toque máxico e auténtico ás melodías. Pero a gran novidade deste 2026 é que os Cantos de Reis de Soutoxuste foron seleccionados para participar nunha serie especial da Televisión de Galicia (TVG) protagonizada polos populares personaxes infantís Os Bolechas. Esta produción, dedicada á tradición dos cantos de Reis en distintas localidades galegas, elixiu Soutoxuste como unha das 12 parroquias ou barrios representativos. O capítulo correspondente xa está dispoñible na plataforma xabarin.gal, onde os máis pequenos poden gozar desta proposta audiovisual innovadora que combina animación con imaxes reais das agrupacións.
Ademais, o 3 de xaneiro a agrupación actuou na cidade de Pontevedra, acompañando á asociación cultural Trépia, que tamén traballa na recuperación de danzas e cantos tradicionais de Reis.
