O Redondela Fútbol Sala Roda Vigo rematou a primeira volta da Terceira División Nacional cunha contundente victoria por 5-1 ante o Sala Ourense 2014, nun partido disputado no pavillón municipal A Bomboneira. O novo adestrador do primeiro equipo, Portu, analizou este encontro e fixo balance da primeira metade da tempada, destacando a mellora progresiva do conxunto redondelán.
No último partido da volta, os locais dominaron desde o inicio e mantiveron a vantaxe no marcador en todo momento. “Puxéronnos o partido bastante de cara e soubemos contrarrestar as fortalezas do rival”, explicou Portu, quen recoñeceu o bo xogo do Sala Ourense, un equipo histórico con experiencia en categorías superiores.
A pesar de estar na zona baixa da clasificación, o Redondela FS atópase fóra do perigo de descenso. Portu subliñou que todos os rivais na categoría son complicados, especialmente para un equipo debutante como o seu: “Estreámonos nunha das categorías máis altas da zona, con rivais que teñen máis bagaxe”. Con todo, o conxunto redondelán soubo competir contra equipos da parte alta e media da táboa.
O balance da primeira volta divídese en dúas fases claras. Nas primeiras xornadas, a pesar de ofrecer bo xogo, o equipo non conseguía os tres puntos, o que afectou á moral. A primeira vitoria chegou na xornada 8, un punto de inflexión: “En canto caeu esa primeira vitoria, vimos os partidos con máis tranquilidade e puidemos demostrar as nosas armas”, afirmou o técnico. Grazas a esa mellora no tramo final, o equipo logrou saír da zona de descenso e pechar a volta con alegría.
Portu identificou como clave a falta de contundencia nos momentos decisivos dos partidos durante a primeira parte da tempada, algo que se corrixiu progresivamente: “Agora somos capaces de dar ese pasiño extra e gañar os partidos”. Como fortaleza principal, destacou o grupo humano e deportivo: “Temos un grupo moi bo, tanto no deportivo como no humano”. Esta unión permitiu superar unha racha de lesións que afectou a media plantilla –con problemas musculares, articulares, roturas de ligamentos e incluso unha operación nun porteiro–. Grazas á estrutura do club, con filial en Preferente e xuvenil en División de Honra, puidéronse incorporar xogadores da canteira para manter a competitividade.
De cara á segunda volta, que arrincará o segundo fin de semana de xaneiro, o obxectivo principal segue sendo a salvación: “Ir xornada a xornada, sendo ambiciosos pero sen descartar nada, e sobre todo non descoidar a permanencia”. O adestrador confía en recuperar case toda a plantilla durante o parón de Nadal, o que permitirá realizar unha pequena pretempada para chegar en óptimas condicións.
Portu mostrou ganas de enfrontarse aos rivais das primeiras xornadas para demostrar a mellora do equipo, e destacou como partidos especiais os derbis contra equipos da zona como Pazos de Borbén, Marín, Bueu ou Vigo 2015.
Finalmente, o técnico eloxiou a humildade e o traballo do club: “Somos un club humilde, pero con xente que se esforza moito”. Resaltou o orgullo de contar con tres equipos en categorías altas en Galicia –xuvenil en División de Honra, Sénior B en Preferente e Sénior A en Terceira División Nacional– e animou a máis cativos a incorporarse á base, para fortalecer o futuro do fútbol sala en Redondela e promover o deporte fronte ás pantallas.
Con moral alta tras o 5-1 final, o Redondela FS Roda Vigo encara a segunda volta con optimismo, confiando no seu grupo e na recuperación dos lesionados para loitar pola permanencia.
