As obras de reforma no Campo Municipal de Santa Mariña consistirán na renovación integral dos vestiarios, almacén e outras instalación así como a substitución de toda a iluminación actual por tecnoloxía LED nos campos de fútbol e pistas de tenis anexas. Unha actuación que suporá un investimento de case 250.000 euros e que estará rematada no primeiro trimestre do vindeiro ano.
A alcaldesa, Digna Rivas, e o concelleiro de Deportes, Antonio Cabaleiro, visitaron o Campo de Fútbol Municipal de Santa Mariña xunto a Ramón Castro, da directiva do CD Choco. Os traballos de reforma xa comenzaron para acometer a renovación integral dos vestiarios, oficinas e almacén, así como unha nova iluminación LED. Estas instalacións municipais presentaban un estado de conservación pésimo, xa que teñen varias décadas de antigüidade e ata o de agora nunca se realizaran traballos de mellora nunhas instalación empregadas por preto de 300 rapaces e rapazas.
A reforma incluirá todos os vestiarios, aseos e lavabos, a sala de fisioterapia, zona da lavandaría, sala de caldeira, local social e almacén. Instalarase un novo pavimento, tamén novas xanelas e portas que permitirán un illamento óptimo, renovarase toda a instalación de fontanaría e impermeabilizarase a cuberta para evitar filtracións.
O proxecto inclúe tamén a substitución de toda a iluminación dos campos de fútbol e as pistas de tenis anexas por tecnoloxía LED máis eficiente. Isto vai permitir unha importante redución no consumo eléctrico cun aforro de máis de 30.000 euros anuais.
O proxecto de reforma no Campo de Fútbol de Santa Mariña está valorado en 249.386 euros e finánciase a través do II Plan de Infraestruturas Deportivas da Deputación de Pontevedra. As obras estarán rematadas no primeiro trimestre de 2026.
