O Concello de Redondela vén de asinar un convenio coa Confraría de Pescadores San Xoán por valor de 10.000 euros. Estes fondos destinaranse a rexenerar os bancos marisqueiros con semente de ameixa.
O acordo asinárono a alcaldesa, Digna Rivas, e a Patroa Maior do pósito Nisi Otero. No acto participo tamén o concelleiro de Emprego, Alberto Álvarez. A través deste convenio o Concello de Redondela achega á Confraría unha subvención de 10.000 euros. Estes fondos servirán para a compra de semente de bivalvos, neste caso ameixa xaponesa, para repoboar os bancos marisqueiros nos que faena tanto o marisqueo a pé como a flote. Actualmente a confraría conta con 190 socios e socias.
A alcaldesa puxo de manifesto a importancia de apoiar desde o Concello a este colectivo “que desenvolve unha labor económica fundamental na ría cun traballo artesanal e sostible do que viven ducias de familias do noso municipio”. Rivas destacou especialmente “a gran labor das mulleres no mar, que realizan neste sector un duro traballo moitas veces invisibilizado”.
