A Asemblea pola Sanidade Pública convoca unha concentración o próximo xoves 6 de novembro ás 11:00h fronte ao Centro de Saúde de Redondela, para continuar coa loita cidadá en defensa da sanidade.
O colectivo reitera as demandas máis urxentes e que pasan pola cobertura dos profesionais ao 100% durante todo o ano, a contratación dun médico de familia máis para o Centro de Saúde de Pazos de Borbén, para poder atenden aos 1700 usuarios, o retorno do Servizo de Pediatría aos Centros de Saúde de Fornelos e de Pazos de Borbén así como garantir a atención pediátrica no PAC que evite a derivación das Urxencias ao Hospital Álvaro Cunqueiro.
Outra das demandas pasa por esixir unha maior axilidade nas citas de medicina familiar e pediátrica, que non deben exceder das 48 horas “cando na actualidade chegan demorarse nalgúns casos ata varias semanas”.
A portavoz de asemblea, Ana González, insiste en que “a saturación do sistema público de saúde pretende obrigar ós pacientes a acudir a consultas privadas; consultas que, cando o caso é grave, vense derivadas de novo á sanidade pública”.
A plataforma fai un chamamento tanto a profesionais como a usuarios e usuarias dos centros de saúde de Chapela, Pazos de Borbén, Fornelos de Montes e Redondela a apoiar esta loita social.
