O novo departamento estará en mans da aldaldesa, Digna Rivas, e terá como obxectivo “difundir e dar a coñecer os valores democráticos, así como dignificar ás vítimas da represión”. A nova área tamén porá en valor a historia da illa de San Simón, símbolo da represión franquista e declarada Lugar de Memoria Democrática. O Concello decide así asumir esta responsabilidade “ante o desinterese da Xunta de Galicia neste asunto e a negativa a que Redondela participe no órgano de xestión da illa”.
A estrea cinematográfica da película “San Simón” que este domingo era proxectada no Multiúsos da Xunqueira serviu de marco para anunciar a creación dunha nova área no goberno de Rivas: a concellería de Memoria Democrática. A alcaldesa, Digna Rivas, será a responsable desta área “xa que desde o Concello levamos anos facendo actividades relacionados con memoria democrática, pero non estaban unificados nunha única área específica”. O obxectivo principal é “o coñecemento e a aprendizaxe en valores democráticos, sobre todo para as novas xeracións”, explica a alcaldesa quen insiste en que ante o auxe dos discursos da extrema dereita e o crecemento da ideoloxía neo fascista “coñecer a historia é agora máis importante ca nunha”.
Unha das liñas de traballo da concellería será crear unha base de datos sobre a represión en Redondela, con información que se incluirá na web do Concello. “Pretendemos recoller o acontecido durante a Guerra Civil e o franquismo e incluír tamén a historia das madriñas de San Simón e de tantas mulleres solidarias coas vítimas da represión” avanza Rivas. A pasada semana a alcaldesa mantivo unha reunión informal co ministro Ángel Víctor Torres, quen lle trasladou o apoio do Goberno ás iniciativas do Concello en canto á memoria democrática. Torres anunciou tamén que avanzarán nos trámites para que San Simón sexa lugar de memoria “antes dun ano”.
Illa de San Simón
A alcaldesa lembra que a Xunta de Galicia negou reiteradamente a participación do Concello no órgano de xestión da illa, “polo que teremos que encargarnos desde a administración local de divulgar o que aconteceu alí”, sinala Rivas. A rexedora redondelá en abril deste ano mantivo unha xuntanza co conselleiro de Cultura, José López, que se comprometeu a realizar actividades de memoria democrática na illa “pero seis meses despois non tivemos ningunha noticia”. A ocultación do que supuxo a represión en Redondela levou a que no Parlamento Galego se negase os mortos en San Simón, onde ademais dos fusilados faleceron máis de 500 presos por desnutrición ou enfermidades.
