A Federación de ANPAS colabora cos centros educativos de ambos os dous concellos co obxecto de ofrecer ao alumnado de sexto de primaria unha educación baseada no respecto, na empatía e na diversidade. Neste obradoiro achegaráselle ao alumando ferramentas para comprender os cambios do corpo, expresar emocións e aprender a convivir dende o respecto.
“Educación en sexualidade adaptada para sexto de primaria” é unha proposta que pretende introducir esta temática nas aulas dunha maneira profesional, participada e adaptada á súa idade. Así, nestes obradoiros abórdanse temas como a diferenza entre o íntimo, o privado e o público; o respecto e o consentimento afirmativo; e a importancia de recoñecer e expresar as propias emocións.
Esta actividade busca axudar ás crianzas a medrar con coñecemento, respecto e seguridade, ofrecendo espazos de aprendizaxe nos que poidan comprender os cambios do seu corpo, as emocións e as relacións coas demais persoas. A sexualidade abordarase desde unha perspectiva educativa, igualitaria e inclusiva, promovendo o respecto polas diversas identidades e orientacións sexuais, polos diferentes tipos de familias e modelos relacionais, promovendo unha educación en igualdade para previr o acoso dende as aulas de primaria.
Os obradoiros desenvolveranse en cada aula de sexto de primaria e estarán deseñados e impartidos por profesionais da educación en sexualidade, con experiencia no traballo con alumnado de primaria e formación en igualdade de xénero.
A metodoloxía será dinámica, divertida e participativa, favorecendo a comprensión e o diálogo. Os materiais educativos empregados foron creados e adaptados especificamente para esta idade.
O obxectivo último desta iniciativa é fomentar o autocoñecemento e a aceptación persoal como base para establecer relacións sas e respectuosas, promovendo valores como o respecto e a empatía.
Con esta acción, a Federación de ANPAS reafirma o seu compromiso coa educación integral e igualitaria, entendendo que a educación en sexualidade é unha ferramenta imprescindible para a formación dunha cidadanía consciente, empática e respectuosa.
Esta actividade conta coa colaboración da Consellería de Política Social e Igualdade da Xunta de Galicia, enmarcada nas axudas económicas as ANPA destinadas á promoción da igualdade e á prevención e loita contra a violencia cara as mulleres, desenvolvidas no marco do Pacto de Estado contra a Violencia de Xénero.
