Fotos de @samuucardenas
A xove rider galega Vera Vázquez, do TMKiteClub de Cesantes, fixo historia ao proclamarse campioa do mundo de kitesurf na modalidade de Freestyle Sub19 Feminino. A proba, encadrada no calendario internacional da Global Kitesports Association (GKA), celebrouse a pasada semana en Tarifa, Cádiz, un dos epicentros mundiais deste deporte. Con tan só 17 anos, Vera convértese na primeira regatista galega en acadar un título mundial en categoría xuvenil feminina, marcando un fito para o deporte galego.
Vera Vázquez demostrou un nivel excepcional durante a competición, superando ás mellores promesas internacionais do kitesurf. Na final, descrita por ela mesma como “durísima ata o último segundo”, executou trucos de alta complexidade como o back mobe e o kite loop, que lle valeron a máxima puntuación dos xuíces e o ansiado título. A galega compartiu pódium con Aya kasabova, que logrou a prata, e Elena Kyngdon, que se levou o bronce. “CAMPEONA DEL MUNDO FREESTYLE OTRO ROLLO!! Menuda final… enhorabuena a todas las competidoras con las que compartí pódium”, escribiu Vera nas súas redes sociais, destacando o nivel competitivo da proba.
Este triunfo súmase a unha traxectoria meteórica en 2024, ano no que Vera xa lograra un terceiro posto no campionato mundial e o título de subcampioa de España na mesma modalidade. A súa vitoria en Tarifa, onde as condicións de vento como o Levante e o Poniente poñen a proba a habilidade dos riders, reflicte o arduo traballo desenvolvido xunto ao seu club e equipo técnico. A Copa do Mundo Xuvenil da GKA reuniu a máis de 50 deportistas de todo o mundo, consolidando este evento como unha plataforma clave para descubrir novos talentos nun deporte en crecemento, que en España conta con preto de 20.000 practicantes activos.
Nas súas redes, Vera expresou a súa gratitude a todos os que fixeron posible este logro: “Gracias a mis padres y a mi familia por todo lo que han hecho para que esto sea posible y a Rafa Montero e Rafael Montero Ruiz por todo el apoyo y los consejos desde el primer día, sin vosotros no hubiera sido posible ”. Tamén dedicou palabras ao seu equipo do TMKiteClub Cruceiro, mencionando a Fran Bis, Iago Fernández, Alberto Chas e Felipe Moure pola súa “paciencia infinita” e motivación diaria, así como aos seus amigos e á comunidade de Cesantes, “sempre animando e dándome consellos ”. Ademais, destacou o papel de Salitre Club, “moito máis que un traballo, un lugar seguro onde aprendo, comparto e crezo cada día”.
O éxito de Vera non só pon en valor o potencial do kitesurf galego, senón que tamén inspira a novas xeracións, especialmente ás mulleres, nun deporte que combina técnica, forza e creatividade.
