Paula Amoedo na rúa Pai Sarmiento, lugar da iniciativa
O Concello de Redondela presentou unha iniciativa para transformar a rúa peonil Pai Sarmiento nun lenzo ao aire libre coa creación dun gran mural-alfombra no chan, un proxecto que busca render homenaxe á tradición das alfombras florais da vila. Liderada pola artista local Paula Amoedo, a obra será a primeira deste tipo realizada directamente no pavimento da rúa, sumándose á crecente colección de murais que decoran edificios e espazos públicos de Redondela.
O mural, que empregará materiais resistentes para soportar o paso do tempo e o tránsito peonil, inspírase nas técnicas das alfombras florais tradicionais, as da festa da Coca. Paula Amoedo explicou que consultou con alfombristas locais para incorporar os seus coñecementos: “Vai ser unha alfombra tradicional, relacionada coas festas da Coca, cos motivos que se fan nesas alfombras. Elas saben moito disto, levan anos facendo deseños para a festa da Coca, e poden achegarme moitas ideas”.
A iniciativa, pensada para fomentar a participación interxeracional, está aberta a persoas maiores de 12 anos, aínda que, segundo Amoedo, “de momento hai máis interese entre a mocidade que entre persoas maiores”. A artista lamentou que os maiores “non están acostumados ou non dan por feito que tamén poden apuntarse”, pero animou a toda a veciñanza a sumarse: “Se eu fose nena e puidese volver atrás, estaría encantada de facer estas cousas. Os nenos teñen unhas vacacións longas no verán e hai que ofrecerlles actividades. Pintar e encher ocos non require unha destreza profesional, só ganas e entusiasmo”.
O proceso de creación será similar ao dun mural en parede, pero adaptado ao chan. “É o mesmo que un mural normal, só que feito no chan, como unha alfombra que responde ao pavimento. Queremos que dure o máximo posible, non dous meses, senón anos”, explicou Amoedo. A rúa Pai Sarmiento, peonil e con acceso limitado a vehículos de carga e descarga, é o escenario ideal para este proxecto. “Por alí xa non pasan coches, só algúns para descargar, e hai bares que poñen mesas na rúa”, engadiu.
A elaboración do mural terá lugar do 1 ao 5 de setembro, en horario de 10.00 a 12.00 horas. O luns 1 de setembro comezarán os preparativos no Multiúsos da Xunqueira, mentres que de martes a venres a actividade trasladarase á propia rúa. A participación é gratuíta, e as persoas interesadas poden inscribirse no Multiúsos da Xunqueira ou presentar a solicitude no Rexistro Xeral do Concello ata o 29 de agosto.
Paula Amoedo destacou o carácter comunitario do proxecto: “Quero que sexa unha experiencia para todos, que os nenos e nenas, e tamén os maiores, se sintan parte desta obra que vai enriquecer Redondela”.
Esta iniciativa consolida a aposta de Redondela por integrar a arte urbana e a tradición, convertendo os seus espazos públicos nun escaparate de creatividade e orgullo local.
