TangoMango actuará o vindeiro xoves 21 de agosto, na Brisa Chiringo de Cesantes, dentro do ciclo musical “Blues and Rías Summer”. O concerto ofrecerá unha oportunidade única para gozar do potente directo dun grupo que está a renovar a escena musical local coa súa proposta de soul e funk de influencia americana, pero con letras en español.
Liderados por Toño López (coñecido polo seu traballo en bandas como The Soul Jacket e Mambas Negras), TangoMango presentará os temas do seu primeiro disco homónimo, autoeditado o pasado 15 de xuño. O grupo, que conta cunha formación de músicos veteranos, está composto por Cibrán Rey (batería), Guillermo Gagliardi (guitarra), Diego Alonso ‘Tornado’ (saxofón), Julio Llorca (baixo), Antonio López ‘Monano’ (teclados), Carlos Docampo (percusión) e Andrea Pérez (saxofón).
Tras unha exitosa presentación oficial na sala Supersonic e unha campaña de crowdfunding que lles permitiu financiar a edición do seu disco en vinilo, TangoMango consolídase como unha das propostas máis interesantes da música galega. O seu concerto na Brisa Chiringo é unha cita ineludible para os amantes do bo soul e funk.
