Obradoiro de pancartas na Alameda de Rosalía de Castro en Chapela
A Plataforma pola Defensa da Sanidade Pública de Redondela redobra os seus esforzos na loita contra o deterioro do sistema sanitario público cunha asemblea aberta programada para hoxe xoves, 7 de agosto, ás 19:00 horas, na Casa da Cultura de Redondela (Praza Figueroa, 3). Este encontro, que busca definir novas accións de rúa como concentracións ou manifestacións, é unha continuación da campaña iniciada o pasado 23 de xullo para visibilizar as graves carencias nos centros de saúde da zona.
A Plataforma, apoiada por representantes políticos do PSOE e BNG, así como por numerosos veciños, denuncia unha situación “insostible” en Redondela, Chapela, Pazos de Borbén e Fornelos de Montes, onde a falta de persoal sanitario e as longas listas de espera están a comprometer o dereito á saúde da cidadanía. A voceira da Plataforma, Ana González, sinala que a crise actual é froito dunha “intención deliberada de colapsar o sistema público” para favorecer a sanidade privada. En Redondela, os centros de saúde sofren a ausencia de catro médicos, un pediatra e cinco enfermeiros, o que provoca esperas medias de 18 días para unha consulta médica e ata mes e medio para análises de sangue. En Chapela, a situación non é mellor: dos seis médicos habituais, faltan tres, xunto cun pediatra e catro dos sete enfermeiros dispoñibles, cunha demora de 16 días para citas e tres semanas para extraccións. Nos concellos de Pazos de Borbén e Fornelos de Montes, a falta total de médicos durante o verán obrigou á poboación, especialmente ás persoas maiores, a desprazarse a Redondela, saturando aínda máis o sistema.
A campaña da Plataforma ofreceu o pasado 31 de xullo cun obradoiro na Alameda de Rosalía de Castro, en Chapela, onde se ensinaron ferramentas prácticas para empoderar á cidadanía. Durante a actividade, os asistentes aprenderon a presentar reclamacións formais a través da aplicación móbil do Sergas, un recurso que, segundo González, “moitas veces é descoñecido ou mal utilizado pola poboación”. Ademais, elaboráronse pancartas con mensaxes de denuncia que foron colocadas en puntos estratéxicos de Redondela e Chapela para dar visibilidade á loita.
A Plataforma critica a “planificación nefasta” do Sergas, que non cubriu axeitadamente as vacacións do persoal sanitario, previstas dende marzo, o que xerou un colapso que afecta tanto aos profesionais, con situacións de estrés e risco de baixas laborais, como aos usuarios, que ven vulnerado o seu dereito a unha atención sanitaria digna. “Isto empurra á xente á sanidade privada, pero non o imos consentir”, afirmou González, que lamenta a falta de resposta por parte do Sergas e da Consellería de Sanidade ante as reiteradas peticións de diálogo.A asemblea de hoxe busca consolidar o movemento cidadán e coordinar novas accións para manter a presión sobre as institucións. “A sanidade pública non se vende, deféndese”, conclúe González, facendo un chamamento á cidadanía para que se sume á loita por un servizo sanitario “digno, accesible e de calidade para todos”.
