A SD Pazos de Borbén FS deu o pistoletazo de saída á nova tempada co inicio dos adestramentos do primeiro equipo este luns, marcando o comezo dunha pretemporada que se prolongará durante cinco semanas. O club, referente do fútbol sala na comarca, encara o curso con ilusión, un plantel competitivo e as inscricións abertas para as súas escolas deportivas, invitando aos máis novos a sumarse chamando ao 607473234.
O equipo sénior, que competirá na esixente Terceira División a partir do 14 de setembro, estará dirixido por terceira tempada consecutiva por Alberto Matilla, co apoio de Antonio Cernadas como segundo adestrador. A dirección deportiva logrou o obxectivo de renovar a maioría do plantel que acadou o terceiro posto e pelexou polo ascenso a Segunda B na pasada campaña, garantindo continuidade e competitividade.
Baixas sensibles e incorporacións de calidade
O clube terá que asumir a despedida de tres históricos: Joni e Jonás, que tras 15 e 13 anos defendendo a camiseta vermella colgan as botas, e Aarón, que por motivos laborais xogará no equipo filial en Preferente. Ademais, os alas Manu e Xandre causarán baixa por incompatibilidades laborais e de estudos coa esixencia da categoría.
Para reforzar o equipo, a SD Pazos traballou con acerto na confección do plantel, incorporando xogadores de nivel. Destaca o regreso de Esteban, o histórico gardameta formado no club, que volverá defender a portería vermella. Tamén se suman Joni Costas, talentoso ala procedente do Stellae Leis de Segunda B; Chino, peche de 21 anos do filial do Leis; e Martiño, ala de 20 anos tamén do filial do Leis, que debutará no equipo do seu pobo.
Un calendario ambicioso
A tempada oficial arrincará o 30 de agosto coa Copa Galicia, onde os pacenses visitarán ao ADFS Bueu. Dúas semanas despois, o 14 de setembro, estrearanse na Terceira División cun emocionante derbi ante o ED Vigo 2025. A categoría promete un nivel e competitividade crecentes, un reto que o equipo de Matilla afronta con optimismo.
Un club en crecemento
Baixo a presidencia de Manuel Ferreira, a SD Pazos vive un momento doce. O club batirá este ano o seu récord con 13 equipos, 180 licencias e un aumento de socios. O equipo sub-23 competirá en Liga Preferente tras proclamarse campión de Primeira Autonómica, mentres que o alevín “A” xogará na Liga Galega tras un brillante ascenso.
Inscricións abertas nas escolas
A SD Pazos, que celebra 33 anos como referente do fútbol sala, invita ás familias a inscribir aos seus fillos nas súas escolas deportivas. Os interesados poden contactar no 607473234 para formar parte dun proxecto ilusionante que combina formación, valores e paixón polo fútbol sala.
A nova tempada xa está en marcha, e a SD Pazos de Borbén FS prepárase para deixar a súa pegada dentro e fóra da pista.
