Este mes de agosto, os martes en Redondela veñen cargados de propostas ecoturísticas e culturais que combinan historia, natureza e lendas. Hoxe, 5 de agosto, ás 21:00 horas, dáse o pistoletazo de saída cunha visita guiada ao Cemiterio dos Eidos, recoñecido como o “máis bonito de España”. Esta actividade, que se repetirá o martes 19 de agosto á mesma hora, invita a descubrir a historia e a beleza singular deste lugar emblemático.
Os martes tamén serán o día da ruta “Redondela oculta: entre a lenda e a superstición”, guiada por Soledad Chayán. Programada para os días 12 e 26 de agosto ás 21:00 horas, esta experiencia mergulla aos participantes nas tradicións e supersticións dos oficios mariñeiros, con historias sobre personaxes míticos como a bruxa Benita, o mago Marcolfo ou Xan Carallás, o lendario fundador de Redondela.
Estas actividades forman parte dunha ampla oferta de ecoturismo e sostibilidade organizada polos departamentos de Turismo, Sostibilidade e Medio Ambiente do Concello de Redondela, pensada para todos os públicos. Para participar, é necesario inscribirse previamente na oficina de turismo, chamando ao 986 40 17 13 ou enviando un correo a turismo@redondela.gal.
