O alcalde de Soutomaior, Manu Lourenzo, mantivo unha reunión co presidente da Federación Galega de Kárate, Óscar Lafuente, e o director técnico, Alberto Álvarez, para ultimar os preparativos da Gran Final da Liga Galega de Kárate. O evento, que se celebrará este sábado, 21 de xuño, no campo de Fútbol Municipal de Salgueirón, reunirá a máis de 550 karatecas de todas as categorías, dos cales máis de 50 representan ao concello de Soutomaior.
A competición desenvolverase en horario de 9:00 a 14:30 e de 16:30 a 20:30, e a entrada será gratuíta para todos os asistentes que queiran gozar deste destacado evento deportivo no municipio. Esta cita promete ser unha xornada chea de emoción e talento, consolidando a Soutomaior como un referente no apoio ao deporte galego.
