Fotógrafo: Darío Miguez Losada
O pasado sábado, 14 de xuño, Redondela acolleu a celebración da terceira edición do Torneo Sarillas Veteranas, un evento que encheu de competición, compañeirismo e compromiso social os pavillóns da Bomboneira e da Marisma. Organizado polo equipo Sarillas, co respaldo do Concello de Redondela, a Sociedade Atlética Redondelá (S.A.R.) e a Federación Galega de Balonmán, o torneo reuniu equipos femininos e masculinos de Galicia, Asturias e Portugal nunha xornada memorable.
Na categoría feminina, participaron Ferrol Terra, Langreo, Astures, Sarillas e BM Chapela, cun podio liderado por Ferrol Terra, seguido de Langreo en segundo lugar e Astures en terceiro. Na competición masculina, con equipos como Bueu, Culleredo, Sarillos, ACD Másters (Portugal) e Riscar, o triunfo foi para Bueu, con Culleredo no segundo posto e Sarillos completando o podio.
A entrega de trofeos estivo amenizada polo grupo de gaitas Airiños de San Simón, que puxo a nota musical a un acto cargado de emoción e recoñecemento ao esforzo dos participantes. Máis aló do deportivo, o torneo destacou polo seu carácter solidario, recadando 1.500 euros a través da venda de rifas, destinados integramente á ONG Da Man. Os números gañadores e os premios do sorteo publicaranse nos vindeiros días nas redes sociais de Veteranas Balonmán Sarillas, onde tamén se indicará como reclamar os premios para aqueles que non puideran facelo o día do evento.
Resultados finais
Equipos femininos:
- Ferrol Terra
- Langreo
- Astures
- Sarillas
- BM Chapela
Equipos masculinos:
- Bueu
- Culleredo
- Sarillos
- ACD Másters
- Riscar
Esta terceira edición consolidou o Torneo Sarillas Veteranas como unha cita imprescindible no calendario deportivo e solidario de Redondela. As organizadoras e organizadores expresaron a súa gratitude ao Concello de Redondela, á S.A.R., á Federación Galega de Balonmán e a todos os patrocinadores e colaboradores, cuxa contribución foi esencial para o éxito do evento.
