Os mergulladores da Garda Civil que buscaban ao mozo de 20 anos veciño de Vigo que desaparecera no Verdugo tras saltar ao río dende a ponte medieval recuperaron o corpo pasada a media noite. O 112 Galicia recibira o aviso dun particular ás 19:40 horas quen presenciara como dúas persoas saltaban ao río desde a ponte de Comboa. Mentres unha delas logrou saír da auga sen dificultade, non conseguían localizar á outra persoa, quen finalmente foi achada sen vida tras máis de catro horas de procura.
Un amplo dispositivo de emerxencia traballou na procura do mozo que desaparecera no río Verdugo a media tarde tras lanzarse á auga dende a ponte de Comboa xunto coa súa parella.
A moza logrou saír da auga polos seus propios medios, pero o mozo non volveu emerxer, o cal levou os presentes a alertaren de inmediato o 112 Galicia.
Tras recibir o aviso, os xestores do Centro Integrado de Atención ás Emerxencias activaron un amplo operativo no que participaron Urxencias Sanitarias de Galicia-061, axentes da Garda Civil, o GES de Mos e voluntarios de Protección Civil da Mancomunidade Oitavén-Tea. Tamén se informou aos Bombeiros do Morrazo.
A contorna da ponte foi acordoada pola Garda Civil para facilitar os labores de rescate. A peor das noticias coñeceuse contra as 12:15 da madrugada, cando un dron localizou o corpo a uns seis metros de profundidade, sendo rescatado polos mergulladores da Garda.
Ata o lugar tamén se desprazou un equipo do Grupo de Intervención Psicolóxica en Catástrofes e Emerxencias (GIPCE), co obxectivo de ofrecer apoio ás persoas afectadas polo suceso así como o forense para proceder ao levantamento do cadáver.
Fontes municipais explican que a zona, malia estar afectada polas mareas, non é especialmente perigosa. De feito, nas inmediacións atópase a praia fluvial da Veiguiña Longa, moi frecuentada por familias en época estival.
