As veciñas e veciños de Soutomaior poderán renovar e facer o DNI de maneira directa no concello, evitando así que teñan que trasladarse a Vigo ou Pontevedra para facer este trámite. O servizo comezará a funcionar o 30 de xuño, terá unha periodicidade mensual e instalarase na casa do concello.
O alcalde de Soutomaior Manu Lourenzo e o concelleiro de Interior, Diego Moreira, reuníronse e cos inspectores da Policía Nacional Esteban Pinilla e Arturo Mediavilla co obxecto de formalizar o acordo que permitirá a este municipio contar co servizo de expedición do DNI e pasaporte a través das oficinas móbiles da Policía Nacional.
O servizo, que está pensado para concellos onde non existe Comisaría ou Oficina da Policía Nacional, permite obter ou renovar o DNI e o pasaporte e estará instalado no propio concello, facilitando así á veciñanza un trámite que ata o de agora a obrigaba a trasladarse a cidades veciñas e perder unha mañá para contar con esta documentación en regra.
O 30 de xuño será a primeira data na que esta oficina móbil se achegue a Soutomaior. As citas pediranse de maneira directa nas oficinas do concello en horario de 9:00 a 14:00h. Nas vindeiras semanas procederase á apertura destas citas para que a veciñanza poida beneficiarse deste servizo.
