O equipo sénior do Redondela FS Rodavigo, que compite en Preferente, acadou o terceiro posto con 63 puntos e 17 vitorias durante a tempada, asegurando a súa clasificación para os play-offs de ascenso á Terceira División Nacional. Este fito marca un novo capítulo para o club, que agora busca dar o salto de categoría co apoio da súa afección.
Este sábado, 17 de maio, o Pavillón Municipal A Marisma acollerá unha xornada inesquecible de fútbol sala. Primeiro, ás 17:00h, o equipo xuvenil de División de Honra disputará o seu último partido en casa contra o Intersala, unha cita especial na que se despedirá a xeración do 2006, que pecha a súa etapa nesta categoría. A continuación, ás 20:00h, o sénior xogará o decisivo partido de play-off de ascenso contra o CVC Valladares, nun ambiente que promete ser vibrante.
O club fai un chamamento á afección para encher o pavillón e apoiar aos xogadores nun día cheo de fútbol sala, sorpresas, sorteos e moita emoción. “Necesitamos que A Marisma estea chea de xente!”, declarou o o club en redes sociais, invitando a todos a unirse a esta cita deportiva.
