A tempada regular das ligas locais de fútbol sala chegou ao seu fin esta fin de semana, deixando resultados vibrantes, obxectivos cumpridos e a mirada posta nos play-offs de ascenso. Os pavillóns enchéronse de emoción, con encontros que decidiron posicións finais, permanencias e, nalgúns casos, descensos. A continuación, repasamos os partidos máis destacados:
CARBALLIÑO F.S. – S.D. PAZOS DE BORBEN FS (5-4)
O S.D. Pazos de Borbén F.S., terceiro clasificado e co pase ao play-off xa asegurado, caeu por un axustado 5-4 ante o Carballiño F.S. nun partido intenso, pero no que os de Pazos xogaron con certa relaxación, reservando forzas para a fase decisiva. Os goles do Pazos foron obra de Jacobo (2), Diego e Fredo, nun encontro que non alterou a súa sólida posición na táboa.
Dende o club, a través das súas redes sociais, celebraron a gran tempada: “A pesar da derrota, rematamos terceiros na competición, o que nos asegura a primeira eliminatoria do play-off ante o Concello de Begonte F.S. no Municipal de Pazos a vindeira fin de semana. Este terceiro posto reflicte unha tempada de sobresaliente, e agora imos a por a matrícula de honra: o ascenso á Segunda División B. Será unha festa en Pazos, onde co apoio da nosa afección nada é imposible. Grazas, rapaces, por facernos vibrar. Isto aínda non rematou!” .
O ambiente promete ser eléctrico no Municipal de Pazos, coa afección disposta a levar en volandas ao equipo na loita polo ascenso.
VINCIOS GONDOMAR F.S. – REDONDELA F.S. RODAVIGO (2-4)
Na categoría Preferente, o Redondela F.S. Rodavigo, tamén clasificado para os play-offs, despediu a tempada regular cunha vitoria a domicilio ante o Vincios Gondomar F.S. por 2-4. Os goles de Uxío, Alejandro, Roi e Óscar selaron un partido dominado polo Redondela, que remata a liga con 63 puntos, nun meritorio terceiro posto, só superado polo Poio Pescamar F.S. (segundo) e o líder, o A.D.I. Vianariño F.S. Este resultado reforza a confianza do equipo de cara á fase de ascenso, onde buscarán consolidar o seu bo rendemento.
O club celebrou este fito nas súas redes sociais cunha mensaxe cargada de gratitude e ambición: “Tras unha magnífica tempada do noso equipo Sénior ‘Rodavigo’, logramos o merecido pase aos play-offs. Queremos agradecer de corazón a cada un dos xogadores, adestradores e corpo técnico polo esforzo, a paixón e o compromiso que demostraron en cada partido e adestramento. Imos a por máis! Isto aínda non rematou. “
A afección do Redondela xa se prepara para apoiar ao equipo nunha fase de play-offs que promete ser apaixonante.
CAMPITO CHAPELA F.S. – A.D.I. VIANARIÑO F.S. (5-12)
O Campito Chapela F.S. pechou a tempada na casa cunha derrota ante o intratable líder, o A.D.I. Vianariño F.S., por un claro 5-12. A pesar do resultado, o Campito logrou o seu obxectivo principal: a permanencia en Preferente, finalizando na 12ª posición da táboa. Os goles locais foron anotados por Alejandro (2), Pedro, Pablo e Sergio, nun partido no que o Vianariño demostrou por que encabeza a clasificación. O Campito, co deber cumprido, xa pensa en reforzarse para a próxima tempada.
PIZARRAS LOS TRES CUÑADOS F.S. – AREALONGA FS CHAPELA (4-0)
O Arealonga F.S. Chapela non puido evitar o descenso, tras caer por 4-0 ante o Pizarras Los Tres Cuñados F.S., quinto clasificado, na última xornada. O Arealonga, con só 13 puntos, finaliza como pechacancelas da categoría, nunha tempada complicada na que non lograron atopar a regularidade necesaria. A pesar diso, o club xa anunciou a súa intención de reestruturarse e regresar con máis forza na próxima campaña.
