O pavillón de A Sangriña, en A Guarda, acolleu a emocionante Final Four da Primeira Autonómica Masculina, onde a SAR OPmobility se proclamou campioa e conseguiu unha merecida praza na fase de ascenso á Primeira Nacional. O equipo redondelán, dirixido por Iván Vázquez, brillou en ambos os dous encontros, demostrando un xogo sólido, unha defensa férrea e unha portería estelar, apoiados en todo momento por unha afición incansable.
Na semifinal, a SAR OPmobility enfrontouse ao Balonmán Línea 21. Desde o asubío inicial, o conxunto da Bomboneira impuxo o seu ritmo cun moi bo arranque, logrando unha vantaxe de 10-2 nos primeiros 10 minutos grazas á súa intensidade defensiva e á eficacia baixo os paus. A pesar da reacción do Línea 21, que recortou distancias ata deixar o marcador en 17-14 ao descanso, a SAR mantivo o control. Na segunda parte, o rival chegou a poñerse a un só gol (19-18, min 36), pero os redondeláns responderon con carácter e talento, rompendo o partido nos últimos 10 minutos. Cunha vantaxe de 32-25 a falta de cinco minutos, a SAR non baixou o ritmo e selou unha vitoria contundente por 36-29, desatando a euforia na grada.
O domingo, a SAR OPmobility mediu forzas contra Granitos Ibéricos Carballal na gran final, nun encontro cargado de emoción e igualdade. O ambiente de final sentiuse desde o primeiro minuto, cun xogo intenso e unha loita constante en cada balón. Ao descanso, o marcador reflectía a paridade, cun axustado 12-13 a favor do rival. Na segunda metade, Carballal logrou poñerse por diante (19-18, min 40), pero a SAR, fiel á súa entrega e concentración, non se rendeu. Cunha defensa sólida e o apoio incondicional da grada, o equipo redondelán deu a volta ao marcador e, con moito corazón e cabeza, pechou o partido cun axustado 21-23.
Esta vitoria consagra unha tempada excepcional para a SAR OPmobility, que finalizou terceira na fase regular con 30 puntos tras un triunfo ante Rasoeiro BM (31-22). A pesar da baixa de Imanol Cobián, lesionado cunha fractura de clavícula, o equipo demostrou a súa fortaleza colectiva. Desde o club, enviáronlle os mellores desexos de recuperación.
Co billete á fase de ascenso á Primeira Nacional asegurado, a SAR OPmobility celebra este fito histórico e prepárase para o próximo reto.
