Coincidindo co Día da Terra, o alumnado de 2º da ESO do IES Pedro Floriani realizou hoxe unha acción de rúa no corazón da vila, froito dun proxecto de meses en colaboración coa ONG internacional Intered. Os 60 rapaces e rapazas, que participaron en 10 a 12 sesións lectivas, traballaron en obradoiros centrados na educación inclusiva, a interacción co entorno natural, o feminismo e os obxectivos da Axenda 2030 europea, entre outros moitos temas actuais.
A iniciativa, que se desenvolveu a través de grupos autónomos e baseada na aprendizaxe cooperativa, buscou fomentar unha cidadanía global crítica, promovendo valores de xustiza, equidade e respecto pola diversidade e o medio ambiente. Durante a acción, os estudantes ocuparon a rúa con pancartas, pandeiretas e altofalantes, compartindo discursos, cantigas e mensaxes de concienciación sobre a importancia de coidar o planeta e construír un futuro máis sostible.
Este proxecto, que forma parte dunha educación transversal en valores, reflicte o compromiso do IES Pedro Floriani cunha educación transformadora. A colaboración con Intered, unha organización que opera en varios países para impulsar a educación e a igualdade, permitiu ao alumnado desenvolver unha acción de rúa completa que non só visibiliza o seu traballo, senón que tamén inspira a cidadanía activa e o compromiso co cambio social.
