Os centros culturais de Cabeiro, Santo Estevo de Negros e Vilar de Infesta acollen unha mostra de debuxos elaborada pola rapazada destas parroquias que pon en valor a riqueza cultural e paisaxística a través da creatividade infantil. A exposición está dispoñible ata finais de xaneiro.
O Colexio Portocabeiro, en colaboración cos Centros Culturais de Cabeiro, Santo Estevo e Vilar de Infesta, inaugura unha exposición única de debuxos realizados polo seu alumnado. A mostra reflicte o patrimonio, os lugares emblemáticos e as paisaxes máis representativas destas parroquias, destacando elementos históricos, culturais e naturais que forman parte da súa realidade cotiá.
Entre os temas representados polos pequenos artistas atópanse o miliario de Vilar, o Castro de Negros, a Igrexa de Cabeiro, o colexio, os Centros Culturais ou as fermosas paisaxes da Ruta da Auga. Estas creacións visibilizan non só a riqueza do entorno, senón tamén a percepción e o vínculo que as novas xeracións teñen co seu patrimonio.
A exposición vai máis alá da simple exhibición artística xa que un dos debuxos seleccionados polas asociacións de Vilar ilustrará os calendarios que se repartirán durante o Nadal de 2025 na parroquia de Vilar, consolidando o vínculo entre a escola e a comunidade local.
Esta exposición é unha chamada á reflexión e á posta en valor do noso entorno. Ao mesmo tempo, é unha celebración da creatividade infantil e unha invitación a coidar e preservar o patrimonio cultural das parroquias.
