www.radioredondela.com Hoxe é Martes, 22 de Outubro de 2019

Fomento axilizará os trámites para instalar un semáforo na N-552 á altura do colexio Angorén
Institucional • 16/09/2019
Autor: M. X. Queimaliños

Representantes de Fomento confirmaron a alcaldesa, Digna Rivas que autorizará a instalación dun semáforo á altura do CEIP Alexándre Bóveda de Chapela logo de que na pasada semana se produciran varias mobilizacións, tanto veciñais como da propia Anpa do colexio, demandando que se mellorara a seguridade vial nunha zona de alta densidade de tráfico. Malia non concretar datas o xefe de demarcación de Estradas confirmou "que no máis breve prazo posible, analizarase unha ubicación para a colocación do semáforo". A petición feita polo anterior goberno quedara paralizada ao "non cumprir os requisitos necesarios".


A alcaldesa de Redondela, Digna Rivas, reuníase este venres en Pontevedra coa subdelegada do Goberno, Maica Larriba e o xefe da demarcación de Estradas do Ministerio de Fomento, Ángel González del Río para transmitir a necesidade de acometer a instalación dun semáforo na N-552, de cara a mellorar a seguridade viaria á altura do CEIP Alexándre Bóveda en Angorén, na parroquia de Chapela.


Rivas informóu tanto á Larriba coma a González del Río que dita infraestrutura xa fora solicitada hai dous anos pola anterior Corporación "e que a estas alturas seguía sen concretarse". Segundo os datos achegados por Fomento, a petición formulada polo anterior Goberno non cumpría "cos requisitos necesarios" polo que quedara paralizada.


Agora, a alcaldesa de Redondela na xuntanza mantida, trasladou "a urxente necesidade da súa realización", ao tratarse dunha infraestrutura que non só dará servizo ao centro escolar, senón á veciñanza desta zona de Chapela atravesada por unha estrada, como a N-552, que rexistra unha alta densidade de tráfico rodado.


Maica Larriba transmitiu á alcaldesa a súa disposición de impulsar esta actuación demandada pola comunidade escolar e no mesmo sentido expresábase Ángel González del Río que asegurou á alcaldesa Digna Rivas, "que no máis breve prazo posible, analizarase unha ubicación para a colocación do semáforo en colaboración cos técnicos municipais".


 

Comentarios

ENVÍA A TÚA OPINIÓN
 
Nome e Apelidos   Correo Electrónico (opcional)
 
Comentario:

Imaxe de Verificación:
Escriba o Código: