www.radioredondela.com Hoxe é Venres, 18 de Outubro de 2019

O goberno local traballa na elaboración de murais artísticos en diferentes puntos da vila
Política • 6/02/2019
Autor: M. X. Queimaliños

Critican que AER queira apropiarse dunha proposta que está en marcha dende hai xa meses, como o amosa o feito de que en outubro do pasado ano se mantiveran xuntanzas cos grafiteiros de cara a estudar a posibilidade de facer murais artísticos en diferentes espazos. Neste sentido xa se solicitou permiso a Fomento para decorar 4 muros, algún deles de gran tamaño.


"A proposta de facer murais artísticos contra o feísmo non é unha iniciativa nova na vila", así o manifestan dende o goberno local que segundo explican xa mantiveron as primeiras xuntanzas cos grafiteiros locais no pasado mes de outubro. A resposta chega días despois de que a Agrupación de Electores anunciase esta iniciativa, unha manobra que consideran dende o PP "como un intento de apropiarse desta idea".


Explican fontes municipais que tras unha primeira xuntanza propuxéronse varios muros, algúns deles de propiedade privada e outros públicos, que son competencia de Fomento. A solicitude para decorar 4 muros, algúns deles de gran tamaño, foi remitida xa ao Ministerio de Fomento e está á espera da autorización.


Tamén dende o Goberno se puxeron en contacto con varios particulares aos que se lle presentaron bocetos dos grafiteiros locais e están valorando os diferentes murais suxeridos. Ademais, chegouse a un acordo cos grafiteiros locais para cederlles un muro libre, que é propiedade do Concello, para que eles expresen o seu arte.


O PP critica a Agrupación de Electores de Redondela por ir "a remolque, querendo facer súa unha acción que xa saben que ten iniciada o equipo de goberno".


 

Comentarios

ENVÍA A TÚA OPINIÓN
 
Nome e Apelidos   Correo Electrónico (opcional)
 
Comentario:

Imaxe de Verificación:
Escriba o Código: