www.radioredondela.com Hoxe é Domingo, 24 de Marzo de 2019

Xuventude pon en marcha un programa de actividades de ocio alternativo nas fins de semana
Cultura • 28/12/2018
Autor: M. X. Queimaliños

A iniciativa está orientada a mozos e mozas de 12 a 17 anos e inclúe un completo programa de actividades deportivas como fútbol e baloncesto, tiro con arco, baile urbano, skate, remo, fitness nocturno ou obradoiros de graffitis e coctelería entre outros. O obxectivo da concellería é que esta actividades se manteñan todas as fin de semana como unha proposta divertida e saudable alternativa a outro tipo de ocio que fomenta o consumo do alcohol ou drogas.


"Xeración LOL" é o nome desta iniciativa posta en marcha dende a Concellería de Xuventude e na que se inclúen diferentes modalidades deportivas e obradoiros orientados a mozos e mozas que teñan entre 12 e 17 anos. O obxectivo é proporcionar a mocidade un ocio alternativo que lles permita fuxir de ambientes onde o consumo de drogas e alcohol son sinónimos de diversión.


Así, este sábado a partir das 23:00 horas e de xeito completamente gratuíto os que o desexen poderán practicar balonmán, fútbol, baloncesto, tiro con arco ou baile urbano nos pavillóns municipais ou natación na piscina municipal.


Na Casa da Torre hoxe celebrarase un obradoiro de graffitis e mañá aprenderase skate e bmx a partir das 18:00 horas. Na discoteca la Movida haberá un obradoiro de DJ e produción hoxe venres e outro de coctelería 0.0 maña sábado.


As propostas complétanse tamén con actividades na alameda de Chapela hoxe venres e o día 4 de xaneiro: parkour e blackline.


O concelleiro de xuventude, Julio Mougán explica que non se trata dunha programación que se limite a este período vacacional "o noso obxectivo é mantelo durante os vindeiros seis meses todos os venres e sábados e ir testando como responden os mozos a este chamamento".


 

Comentarios

ENVÍA A TÚA OPINIÓN
 
Nome e Apelidos   Correo Electrónico (opcional)
 
Comentario:

Imaxe de Verificación:
Escriba o Código: