www.radioredondela.com Hoxe é Martes, 20 de Novembro de 2018

Dous días de actividades acuáticas na praia da Punta
Deporte • 6/07/2018
Autor: Lorena Otero

Kitesurf, paddle, kaiak e unha “big jum” son a oferta que atoparemos esta fin de semana no areal de Cesantes. Competición, exhibicións e cursos para dar a coñecer estas modalidades deportivas e que promove o club redondelán Tmkite. As actividades celebraranse o sábado e domingo dende as 11.00 até as 20.00 horas. Un dos momentos máis espectaculares será a exhibición acrobática onde os participantes amosarán a súa pericia nun entorno como o da Enseada de San Simón.


Todo preparado na praia da Punta para a celebración da primeira Xornada Kitesurf de Redondela na que participarán máis de cincuenta representantes desta modalidade deportiva.  Dende as once da mañá do sábado haberá distintas activades didácticas e formativas para dar a coñecer o kitesurf con cursos gratuítos deste deporte pero tamén de paddle surf e kaiak. Xa pola tarde celebrarase unha regata se o vento o permite.


O domingo pola mañá haberá actividades lúdicas e pola tarde unha exhibición ou "big jump" na que os profesionais do kitesurf  amosarán a súa destreza con espectaculares manobras e saltos. Non faltarán os premios, 2.500 euros en total, ademais do sorteo de material deportivo.


A seguridade tanto de participantes como dos espectadores está garantida, porén delimitarase unha zona para que os kitesurfistas despeguen e aterren con seguridade e o público poida disfrutar do espectáculo nun emprazamento, o litoral de Cesantes, que goza dunhas condicións idóneas para a práctica do Kitesurf e deportes acuáticos.


 

Comentarios

ENVÍA A TÚA OPINIÓN
 
Nome e Apelidos   Correo Electrónico (opcional)
 
Comentario:

Imaxe de Verificación:
Escriba o Código: