www.radioredondela.com Hoxe é Domingo, 22 de Xullo de 2018

Medio Ambiente elimina sete vertedoiros incontrolados en parroquias de Redondela
Institucional • 19/03/2018
Autor: Ana Prieto

Cascallos de obra, mobles, electrodomésticos ou penumáticos son algúns dos residuos que teñen aparecido en distintos puntos das parrquias de Redondela en vertedoiros ilegais. Concello e Xunta de Galicia veñen de poñer en marcha un programa para eliminalos e rexenerar os terreos onde se atopan.


A Consellería de Medio Ambiente iniciou hoxe os traballos para eliminar vertedoiros incontrolados en Redondela que afectaban a distintas parroquias. Trátase de puntos de vertidos en Cabeiro, Cedeira, Mamoa do Rei, Trasmañó, na contorna do campo fútbol Chapela, Buraca e Río Frío. O delegado da Xunta, Ignacio López-Chaves, visitou esta mañá o operativo acompañado polo alcalde, Javier Bas, e o concelleiro de Medio Ambiente, Miguel Álvarez. Os puntos de vertidos incontrolados son pequenos focos nos que se teñen ido acumulando residuos de diversa índole. Álvarez explica que se atopan desde electrodomoésticos ata mobiliario, pasando por cascallos de obra ou pneumáticos. Estes refugallos supoñen un prexuízo para o entorno, tanto dende o punto de vista ambiental como estético. Os traballos de acondicionamento, que durarán varios días, consistirán na recollida, clasificación e retirada dos residuos, a rexeneración dos terreos mediante o estendido de terra vexetal e hidrosementeira. Coa limpeza destes vertedoiros a consellería busca "minimizar e corrixir" o impacto orixinado nesas zonas. O edil de Medio Ambiente advirte que a cidadanía está cada vez máis concienciada na correcta xestión dos residuos, malia que aínda hai pequenos empresarios que seguen depositando residuos no monte de xeito ilegal "por aforrar uns cartos". O delegado do goberno explicou que estas actuacións contan cun orzamento de 12.000 euros, achega coa que a Consellería de Medio Ambiente colabora co Concello de Redondela para a eliminación dos residuos e a recuperación do entorno. O obxectivo destes programas é facilitar aos concellos o cumprimento das súas competencias en materia de residuos urbano. Perséguese, por unha banda, reverter a degradación ambiental ocasionada polos vertidos e, por outra, promover a correcta xestión dos residuos, mediante a súa reciclaxe e tratamento.

Comentarios

ENVÍA A TÚA OPINIÓN
 
Nome e Apelidos   Correo Electrónico (opcional)
 
Comentario:

Imaxe de Verificación:
Escriba o Código: