www.radioredondela.com Hoxe é Venres, 20 de Outubro de 2017

Reapertura da biblioteca de Arcade unha semana despois da inundación que afectou ás instalacións
Cultura • 9/10/2017
Autor: M. X. Queimaliños

A Biblioteca Municipal Luís Seoane en Arcade abrirá este luns as súas portas novamente tras unha semana de peche motivado pola inundación sufrida o pasado fin de semana. O centro non se abrirá completamente ao público ao continuar os traballos de reparación tras o incidente, pero manterá o seu horario habitual de luns a venres de 9:00 a 14:00 e de 16:00 a 20:00 horas.


O centro non poderá ofrecer todos os servizos habituais xa que aínda non se repararon todos os danos ocasionados pola inundación, pero tras a inspección dos técnicos municipais, que constataron que non existía ningún perigo, decidiuse reabrir a parte do recinto que non se viu afectada pola auga para poder levar a cabo a maior parte das iniciativas que organiza a biblioteca, como os talleres de idiomas ou as clases de apoio para escolares.


A rotura dunha tubaxe do edificio no que se atopa a biblioteca, na rúa Ilas Alvedosas de Arcade, afectou a estas instalacións, estragando unha cantidade importante de libros así como material informático. A edil de Cultura de Soutomaior, Dolores Cernadas, expresou a súa satisfacción pola rapidez coa que se están solucionando as cousas e que nos permitirá reabrir a biblioteca case con total normalidade.


 

Comentarios

ENVÍA A TÚA OPINIÓN
 
Nome e Apelidos   Correo Electrónico (opcional)
 
Comentario:

Imaxe de Verificación:
Escriba o Código: