www.radioredondela.com Hoxe é Venres, 25 de Maio de 2018

Últimas prazas para participar do curso de lingua e cultura galegas que organiza Normalización
Cultura • 3/01/2017
Autor: M. X. Queimaliños

Un curso de lingua e cultura galegas para persoas adultas, que se desenvolverá dende o 9 de xaneiro ao 28 de febreiro destinado a persoas maiores de idade non escolarizadas en galego na súa etapa formativa ou procedentes de fóra de Galicia que vivan no concello de Redondela. A inscrición é de balde e debe formalizarse no Servizo de Normalización Lingüística (multiúsos da Xunqueira, oficina 4 - baixo), ou a través do correo electrónico normalizacion@redondela.es ou do teléfono 986 400 106.


Un curso que se desenvolverá na Casa da Cultura de Redondela e constará de 30 horas lectivas, repartidas en tres sesións semanais (luns, mércores e xoves, de 11:00 a 12:30 h), e será maiormente práctico, cuns mínimos contidos teóricos. O obxectivo é que as persoas asistentes se acheguen á lingua e cultura galegas a partir da oralidade, do traballo en equipo e da realización conxunta de actividades.


Esta actividade formativa e de socialización en lingua galega permite participar a persoas non habituadas a escribir ou falar en galego, que descoñecen a nosa lingua ou que queren mellorar a súa competencia lingüística. Ao mesmo tempo, promove o coñecemento da cultura e a historia de Galicia, das súas principais manifestacións, e da historia, a toponimia e as manifestacións culturais máis importantes de Redondela.


O obxectivo desta actividade formativa é facilitar a integración na sociedade galega e redondelá a persoas procedentes de fóra, promover o intercambio cultural e lingüístico, e contribuír a mellorar a competencia lingüística da veciñanza redondelá.


 

Comentarios

ENVÍA A TÚA OPINIÓN
 
Nome e Apelidos   Correo Electrónico (opcional)
 
Comentario:

Imaxe de Verificación:
Escriba o Código: