www.radioredondela.com Hoxe é Mércores, 23 de Maio de 2018

Ana González Rivera: "Xogar no Deportivo é un salto importante a nivel futbolístico e persoal"
Deporte • 18/10/2016
Autor: Ana Prieto

Procedente do Sárdoma, esta xogadora redondelá de 21 anos, está a vivir un soño feito realidade. Anita, como é coñecida no mundo deportivo, compaxina os seus estudos de INEF e os adestramentos co Depor na cidade herculina. Non se esquece da súa vila natal e lembra todos os esforzos que fixeron posible ter chegado a onde agora está.


A gardameta asegura estar a vivir unha experiencia "fantástica" a todos os niveis, e recoñece que nunca pensou en chegar á ser titular na Segunda Nacional cando, sendo unha adolescente, deixou o seu equipo local polo Erizana. Logo chegou o salto de categoría ao Sárdoma, e agora o Deportivo. Asegura sentirse ben na Coruña, malia que se recoñece sempre "redondelá". O proxecto do Deportivo Feminino é moi ilusionante para ela. O equipo naceu esta temporada, pero coa ambición de crear un conxunto de calidade para competir na Segunda Nacional con garantías. Anita destaca que en moi pouco tempo o adestrador, Manu Sánchez, fixo un equipo compensado e competitivo, que conta con algunas das mellores xogadoras da categoría. Algunhas procedentes do Sárdoma, como o caso da redondelá, outras chegadas do Orzán ou Friol. A Segunda Nacional é unha categoría moi esixente, como xa coñece pola súa experiencia no Sárdoma. O Deportivo, logo da vitoria a pasada fin de semana en Vigo ante o Sárdoma (1-5) mantén o liderado do grupo. Con 19 puntos están dous por riba do segundo, o Oviedo Moderno. Ante as asturianas empataron a ceros, e o resto de partidos de liga cóntanos por vitorias. Algunhas tan avultadas como o 12-0 ao Atlético Arousana ou o 11-0 ao Victoria. Unhas diferenzas de nivel que Anita atribúe á xuventude de moitos dos planteis da categoría. Con todo, advirte que na segunda volta os equipos estarán máis asentados e será "moi diferente". Logo do parón de liga desta fin de semana regresan á competición o día 30, será ante o Xixón, equipo afundido na parte baixa da táboa.

Comentarios

ENVÍA A TÚA OPINIÓN
 
Nome e Apelidos   Correo Electrónico (opcional)
 
Comentario:

Imaxe de Verificación:
Escriba o Código: