www.radioredondela.com Hoxe é Domingo, 21 de Outubro de 2018

Concerto do grupo de pandereteiras Lagharteiras no Multiúsos
Cultura • 17/03/2016
Autor: M. X. Queimaliños

A programación da Rede de Músicas Soltas presenta este sábado a un grupo de pandereteiras procedentes de Mos pero tamén con voces de Vigo e Redondela, Lagharteiras que presentan o seu primeiro disco homónimo, unha escolma de cantos, regueifas, xotas, muiñeiras e mazurcas con diversos toques de pandeireta recollidos da tradicional oral galega. O concerto  que ofrecerán no Multiúsos da Xunqueira comeza ás 21 horas mais antes estarán na Sociedade Cultural do Viso cunha aula maxistral e parola acompañadas de Carlos Álvarez. Será a partir das 17 horas e de balde.


As Lagharteiras comezan a traballar no ano 2007 co obxectivo de compilar, conservar e divulgar as músicas, cantos, instrumentos e vestiario tradicional galego. No ano 2010, constituíuse como Asociación Cultural Folclórica "As Lagharteiras", radicada no concello de Mos, aínda que con cantantes tamén de Vigo e Redondela. O 1 de xaneiro de 2015 editaron Lagharteiras, que é o seu primeiro álbum musical e foi gravado entre xullo e decembro de 2013. Unha das súas integrantes, Marta Martínez, veciña da parroquia do Viso, explica que o primordial para o grupo é "recuperar, conservar e transmitir o patrimonio inmaterial que hai detrás da música que interpretan".


Neses camiño de divulgación ofrecen tamén concertos cun repertorio no que intentan dar cabida ás mostras máis características das diferentes zonas de Galicia.




Sen esquecer tampouco o vestiario "porque a roupa forma tamén parte dese legado cultural que durante séculos e xeracións foise transmitindo ata chegar ós nosos días como a fala ou a música, un patrimonio que se está a perder e que forma parte da nosa identidade".


Máis de vinte galardóns en concursos abalan a súa traxectoria no mundo da música tradicional como a súa laboura de recolleita e conservación do patrimonio musical galego.


 

Comentarios

ENVÍA A TÚA OPINIÓN
 
Nome e Apelidos   Correo Electrónico (opcional)
 
Comentario:

Imaxe de Verificación:
Escriba o Código: