www.radioredondela.com Hoxe é Xoves, 24 de Maio de 2018

O Choco non pasa do empate ante o Silva nun partido marcado pola intensa choiva
Deporte • 4/01/2016
Autor: Ana Prieto

Os locais, malia adiantarse no marcador, tiveron logo que remontar os dous goles de Joao e salvaron un punto a poucos minutos do final cun tanto de Hugo. Agora ocupan a cuarta praza, e o domingo volven xogar en Santa Mariña ante o Negreira.


Terceira División


Choco 2-2 Silva


O Choco viu interrompida a súa serie de catro vitorias consecutivas ante o Silva, nun choque no que o conxunto de Marcos Montes logrou polo menos salvar un punto para sumar a súa sexta xornada seguida sen coñecer a derrota. A intensa choiva caída durante toda a xornada marcou o partido, cun xogo práctico e directo que non beneficiou aos redondeláns. O primeiro gol foi dos locais. Félix puxo un medido balón ás costas de Cardelle para que Silva sacase un disparo cruzado que se converteu no 1-0. Nada máis comezar a segunda parte chegou o empate. Molinos controlou mal un balón centrado á área desde o lateral, permitindo a Brais facerse coa pelota para dar o pase que Joao transformou no 1-1. No partido, con moitas faltas e interrupcións, o balón parado foi protagonista. Así, noutra falta lateral, apareceu Joao no segundo pau para cabecear ao fondo da portaría de Cortegoso o 1-2. Co marcador ao seu favor, os visitantes arriscaron menos. Os locais tiveron que optar por un xogo máis directo, e desta forma chegou o 2-2. Félix puxo unha pelota para Hugo, que controlou na área, parouse e volveu arrincar para abrirse o oco xusto que devolvía o empate ao marcador. O reparte de puntos fai que o Choco perda unha posición, agora é cuarto. Na próxima xornada repite como local, e recibe ao Negreira, da metade baixa da táboa.

Comentarios

ENVÍA A TÚA OPINIÓN
 
Nome e Apelidos   Correo Electrónico (opcional)
 
Comentario:

Imaxe de Verificación:
Escriba o Código: