www.radioredondela.com Hoxe é Sábado, 26 de Maio de 2018

Indignación entre os afectados da AP-9 polo apoio da conselleira de Medio Ambiente á ampliación
Sociedade • 14/01/2015
Autor: M. X. Queimaliños

As palabras de Ethel Vázquez na súa visita a Redondela nas que amosaba o seu desexo porque as obras de ampliación da autoestrada e a Ponte de Rande "comecen o antes posible por tratarse dunha actuación importante que repercutirá positivamente na economía da área metropolitana e na mobilidade dos veciños" causan malestar entre os afectados que manteñen que se trata dunha obra "innecesaria, faraónica e que non solucionará os problemas de tráfico".


César Domínguez, da Asociación de afectados critica a incoherencia amosada neste asunto polo PP "que cando estaban na oposición rexeitaba esta obra e defendía a circunvalación e agora aplaude a súa realización de xeito inmediato"


Dende a asociación continúan traballando na defensa dos expropiados para que "os propietarios das 8 casas que van ser derrubadas reciban unha cantidade xusta que lles permita acceder a outras vivendas en condicións semellantes sen teren que hipotecarse". Nese sentido, están á espera de que se resolvan as alegacións presentadas e nas que argumentaban que "no Boletín Oficial do Estado do 2010 no que se incluían as expropiacións tan só se incluía unha vivenda e non as 8 casas que agora se van ver afectadas".


Sobre os prezos propostos por Fomento no levantamento de actas previas e que ascendían a 8 euros o metro cadrado polas fincas rústicas e 90 euros polas edificables, explica Domínguez que non foron aceptados polos prexudicados "quen continúan á espera dunha nova valoracións por parte do Ministerio".


E mentres avanzan os trámites para o inicio das obras logo de que o BOE publicara a adxudicación das obras ás empresas Dragados e o grupo Puentes y calzadas. O tramo afectado polas obras será de 5,9 kilómetros e suporá o ensanchamento da ponte así como do tramo que vai dende Rande a Teis. O custe estimado é de 130 millóns de euros.


 

Comentarios

ENVÍA A TÚA OPINIÓN
 
Nome e Apelidos   Correo Electrónico (opcional)
 
Comentario:

Imaxe de Verificación:
Escriba o Código: