www.radioredondela.com Hoxe é Luns, 13 de Xullo de 2020

Soutomaior aumenta as medidas de protección fronte ao COVID19 e suspende a Festa da Ostra
Institucional • 17/03/2020
Autor: Ana Prieto

O goberno local dá por suspendida a Festa da Ostra deste ano, prevista para abril, e limita o acceso a zonas de lecer. A policía local está a facer un horario intensivo, con patrullas para informar á poboación e aos comerciantes. Protección Civil realizará tarefas de asistencia a persoas maiores para evitar que teñan que desprazarse para mercar alimentos, medicinas ou outros servizos básico.


O Concello de Soutomaior acaba de aumentar as medidas de protección no municipio para evitar contaxios por coronavirus. Tras as cancelacións de actividades e o peche de edificios públicos da pasada semana, esta mañá anunciouse a suspensión da Festa da Ostra, á espera da evolución dos acontecementos, acoutáronse diversas zonas do municipio, e establecéronse diversos servizos de apoio aos cidadáns. Unha das principais medidas de apoio e concienciación é o horario intensivo da policía local, que durante estes días patrulla constantemente por todo o municipio. A súa misión é a de lembrar á poboación as medidas impostas polo Goberno sobre o estado de alarma, aclarar as dúbidas de moitos comerciantes sobre se está permitida ou non a súa actividade e aconsellalos sobre as condicións nas que deben prestar os seus servizos.


Asistencia a persoas maiores


Do mesmo xeito, o servizo de Protección Civil realizará tarefas de asistencia a persoas de avanzada idade para evitar que teñan que desprazarse a realizar a compra de alimentos, medicamentos ou doutros servizos básicos. Para solicitar este apoio os interesados deben dirixirse aos teléfonos 626 477 355 e 652 493 268, en horario de 9 a 14 horas e de 16 a 21 horas.


Outra das medidas adoptadas polo Concello é a suspensión da Festa da Ostra deste ano, prevista para o 5 de abril, e que contaría con Benedicta Sánchez, a gran triunfadora na última gala dos premios Goya do cinema español, como pregoeira. Ademais, o goberno local decretou o peche de diversas áreas de lecer, como o paseo marítimo, e a restrición do acceso a zonas como o Peirao de Arcade, ao que só se permite o paso aos residentes e os traballadores da lonxa.


O alcalde de Soutomaior, Agustín Reguera, destacou que, a pesar de atoparse en servizos mínimos, o consistorio segue funcionando. A atención ao público faise de maneira telefónica e se asesora a quen o necesite sobre como facer os trámites de maneira telemática na sede electrónica. Reguera explica que estas medidas se tomaron "por responsabilidade", e quixo tranquilizar aos veciños lembrando que "só hai que seguir as recomendacións das autoridades sanitarias e ter sentido común".

Comentarios

ENVÍA A TÚA OPINIÓN
 
Nome e Apelidos   Correo Electrónico (opcional)
 
Comentario:

Imaxe de Verificación:
Escriba o Código: