www.radioredondela.com Hoxe é Mércores, 29 de Xaneiro de 2020

As brigadas ecolóxicas chegan ao instituto de Soutomaior
Sociedade • 16/12/2019
Autor: M. X. Queimaliños

As brigadas ecolóxicas forman parte dun proxecto educativo realizado polo Concello en colaboración do Departamento de Bioloxía do IES Soutomaior que ten como obxectivo fomentar a concienciación ambiental entre o alumnado do centro a través diversas accións e iniciativas. O consistorio colaborará achegando novos contendores de reciclaxe para formar, xunto ao compostero instalado recentemente, unha illa completa de recollida selectiva de residuos para o uso exclusivo do centro.


O programa arrancou a semana pasada coa primeira charla dirixida aos alumnos de 1º da ESO. Nela expuxéronse conceptos básicos sobre as causas do cambio climático e organizouse un pequeno xogo no que grupos de alumnos expuñan as accións que se poden levar a cabo para combatelo. Ao finalizar, explicáronse as seguintes fases do proxecto e animouse aos alumnos a participar nas seguintes actividades.


A seguinte fase do programa desenvolverase o 26 deste mes no Multiusos de Arcade. Trátase dun taller creativo no que os alumnos darán vida aos residuos máis habituais nun centro educativo confeccionando traxes e disfraces, humanizando os restos e reforzando a reflexión sobre a orixe e o uso que as persoas damos a eses desperdicios


Por último, a partir do 20 de xaneiro, os brigadistas ecolóxicos comezarán a actuar no IES Soutomaior. A través de campañas de concienciación entre os seus compañeiros, repartición de bolsas de papel na cafetaría do centro e outras actividades, os alumnos porán en relevancia o impacto ambiental do seu centro educativo e fomentarán medidas para reducilo.


A edil de educación, Fátima Vidal, destacou que a gran vantaxe desta clase de iniciativas é que traballa a concienciación dos alumnos a través dos propios compañeiros, fomentando non só os bos hábitos persoais, senón tamén as condutas de grupo responsables co medio ambiente, finalizou a edil.


 

Comentarios

ENVÍA A TÚA OPINIÓN
 
Nome e Apelidos   Correo Electrónico (opcional)
 
Comentario:

Imaxe de Verificación:
Escriba o Código: