www.radioredondela.com Hoxe é Luns, 9 de Decembro de 2019

O Campito Chapela F.S. non deixa de medrar
Deporte • 26/11/2019
Autor: Ana Prieto

Con máis de 150 fichas entre categorías masculinas e femininas, o club de Chapela segue a medrar pola base, pero tamén nas categorías superiores, cun total de 12 equipos. Esta temporada conta tamén cun senior feminino na Primeira Galega para darlle ás rapazas a oportunidade de seguir compentindo no seu deporte favorito.


O presidente, Iago Fernández, adestrador tamén do primeiro equipo masculino, amósase moi satisfeito coa boa acollida das categorías inferiores femininas do Campito Chapela F.S. Contan cun equipo Infantil e outro Cadete na liga autonómica, con moi bos resultados, e este ano tamén puideron inscribir un equipo feminino sénior na Primeira Galega. Para Fernández, aínda que non comezaron moi ben en canto a resultados, o feito de contar cun combinado sénior "xa é un éxito", e desta maneira garanten que as rapazas de categorías inferiores poidan seguir medrando no club e competindo "cando vaian subindo de categoría". Advirte tamén que o primeiro equipo feminino "é moi novo", tan só hai catro xogadoras que sexan sénior, e completan o plantel con futbolistas xuvenís e cadetes.


Redondela Maramar-Campito F.S.


En canto ao primeiro equipo masculino, o Campito pasou nos útlimos anos por distintas categorías e agora está en Preferente, onde comparte liga co Redondela Maramar, co que se enfrontará esta fin de semana. O derbi local dispútase no pavillón da Marisma, cos anfitrións mellor situados na táboa. Con todo, o técnico confía levar unha vitoria para Chapela e anima aos afeccionados do fútbol sala a asistir ao partido, que se disputa o domingo ás 16.15 horas. Fernández quere repetir triunfo logo de gañar a pasada xornada ao Celado Mos.


Obxectivo, a Copa


O Campito é 9º con 14 puntos, e márcase como obxectivo para esta primeira volta escalar unha posición, ata o 8º lugar, para poder disputar a Copa. Cun plantel xoven e renovado, e logo dun comezo de liga irregular, os resultados están a mellorar para o Campito, que confía en garantir a permanencia "canto antes". Pódese decir que a situación na táboa é bastante tranquila para os de Chapela, no ecuador da clasificación, a 13 puntos dos postos de descenso, pero tamén lonxe da cabeza, a 10 puntos do 3º.

Comentarios

ENVÍA A TÚA OPINIÓN
 
Nome e Apelidos   Correo Electrónico (opcional)
 
Comentario:

Imaxe de Verificación:
Escriba o Código: