www.radioredondela.com Hoxe é Luns, 16 de Decembro de 2019

Bombas de calor para combater o frío no novo colexio Igrexa
Institucional • 25/11/2019
Autor: M. X. Queimaliños

Á espera de que a empresa de gas remate cos traballos que permitan conectar a caldeira do centro escolar, a Xefatura Territorial de Educación dotará ao colexio de bombas de calor. Así se acordou nunha reunión celebrada entre a alcaldesa, Digna Rivas, a concelleira de ensino, Olga García e o xefe territorial da Xunta, César Pérez Ares. Na xutanza abordáronse tamén outros problemas como a necesidade de instalación dun ascensor e cambio do falso teito no colexio de Angorén, a falta de espazo para o comedor escolar no Santa Mariña, así como outras demandas para o colexio de Cedeira e Reboreda.


A carencia dun sistema de calefacción no novo colexio Igrexa responde, segundo os responsables políticos, "a problemas técnicos derivados do propio proxecto" e, nese sentido, a alcaldesa destacou "o traballo que, dende o primeiro momento, están a desenvolver o Concello, a Xefatura Territorial de Educación e Gas Natural, de xeito totalmente coordinado, para dar unha solución á maior brevidade posible".


Nese sentido, a empresa de gas traballa xa na conexión entre a rede de subministro e o cadro central de distribución do centro escolar de cara a poñer todo o sistema en marcha do xeito máis rápido posible. Mentres, a Xefatura Territorial dotará ao colexio de bombas de calor de cara a mellorar as condicións térmicas do centro escolar.


Na reunión, Xunta e Concello pecharon unha nova xuntanza para o vindeiro mes de xaneiro, de cara a asinar un convenio de colaboración entre ámbalas dúas administracións que permita abordar a solución a diversos problemas dos centros educativos redondeláns, como a necesidade de instalación dun ascensor e cambio do falso teito no colexio de Angorén; dar solución á falta de espazo para o comedor escolar no colexio Santa Mariña, amais do pintado de fachadas e instalación de canalóns; peche da pista de Cedeira e, un tema de especial importancia como é a reforma integral no colexio de Reboreda.


Na mesma liña, estúdase a posibilidade dende a Xefatura Territorial de, a través dunha partida orzamentaria para mellora da eficiencia enerxética, incluír o cambio de todas as ventás do colexio de Cesantes, de cara a conseguir un mellor illamento térmico.


Tanto Digna Rivas como Olga García Ballesteros agradeceron a "sensibilidade e boa disposición amosada por César Pérez Ares en todos os temas que fan referencia ao ensino de Redondela".


 

Comentarios

ENVÍA A TÚA OPINIÓN
 
Nome e Apelidos   Correo Electrónico (opcional)
 
Comentario:

Imaxe de Verificación:
Escriba o Código: